ਦਿੱਲੀ ਦੇ ਮਹਿਰੌਲੀ ‘ਚ ਸ਼ਰਧਾ ਕਤਲ ਕਾਂਡ ਦੀ ਤਰ੍ਹਾਂ ਇਕ ਹੋਰ ਲੜਕੀ ਦੇ ਕਤਲ ਦਾ ਮਾਮਲਾ ਸਾਹਮਣੇ ਆਇਆ ਹੈ। 10 ਫਰਵਰੀ ਨੂੰ ਦਿੱਲੀ ਵਿੱਚ ਇਕ ਨੌਜਵਾਨ ਨੇ ਆਪਣੇ ਲਿਵ-ਇਨ ਪਾਰਟਨਰ ਦਾ ਕਤਲ ਕਰ ਦਿੱਤਾ ਸੀ। ਇਸ ਤੋਂ ਬਾਅਦ ਲਾਸ਼ ਨੂੰ ਫਰਿੱਜ ‘ਚ ਲੁਕਾ ਦਿੱਤਾ ਗਿਆ। ਇਸ ਤੋਂ ਪਹਿਲਾਂ ਕਿ ਉਹ ਲਾਸ਼ ਦਾ ਨਿਪਟਾਰਾ ਕਰਦਾ, ਕਿਸੇ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ। ਦੋਸ਼ੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਕ੍ਰਾਈਮ ਬ੍ਰਾਂਚ ਸਤੀਸ਼ ਕੁਮਾਰ ਨੇ ਦੱਸਿਆ ਕਿ ਮ੍ਰਿਤਕ ਨਿੱਕੀ ਯਾਦਵ ਹਰਿਆਣਾ ਦੇ ਝੱਜਰ ਦੀ ਰਹਿਣ ਵਾਲੀ ਸੀ। ਉਹ 2018 ਤੋਂ ਪੱਛਮੀ ਦਿੱਲੀ ਦੇ ਉੱਤਮ ਨਗਰ ਇਲਾਕੇ ਵਿੱਚ ਸਾਹਿਲ ਗਹਿਲੋਤ ਨਾਲ ਲਿਵ-ਇਨ ਰਿਲੇਸ਼ਨਸ਼ਿਪ ਵਿੱਚ ਰਹਿ ਰਹੀ ਸੀ। ਸਾਹਿਲ ਦਾ ਵਿਆਹ ਪਰਿਵਾਰ ਵੱਲੋਂ ਕਿਤੇ ਹੋਰ ਤੈਅ ਕੀਤਾ ਗਿਆ ਸੀ। ਨਿੱਕੀ ਅਤੇ ਸਾਹਿਲ ਦੀ ਇਸ ਗੱਲ ਨੂੰ ਲੈ ਕੇ ਬਹਿਸ ਹੋ ਗਈ ਸੀ।
ਨਿੱਕੀ ਨੇ ਸਾਹਿਲ ਨੂੰ ਸਾਫ਼-ਸਾਫ਼ ਕਿਹਾ ਸੀ ਕਿ ਜੇਕਰ ਉਸ ਦੇ ਸਾਥੀ ਨੇ ਕਿਸੇ ਹੋਰ ਔਰਤ ਨਾਲ ਵਿਆਹ ਕੀਤਾ ਤਾਂ ਉਹ ਉਸ ਨੂੰ ਫਸਾਏਗੀ। ਮੰਨਿਆ ਜਾ ਰਿਹਾ ਹੈ ਕਿ ਇਸੇ ਕਾਰਨ ਦੋਸ਼ੀ ਨੇ ਨਿੱਕੀ ਯਾਦਵ ਨੂੰ ਮਾਰਨ ਦੀ ਸਾਜ਼ਿਸ਼ ਰਚੀ ਅਤੇ ਫਿਰ ਇਸ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ|
ਸਾਹਿਲ ਨੇ 10 ਫਰਵਰੀ ਨੂੰ ਆਈਐਸਬੀਟੀ ਨੇੜੇ ਇੱਕ ਕਾਰ ਵਿੱਚ ਮੋਬਾਈਲ ਦੀ ਕੇਬਲ ਨਾਲ ਨਿੱਕੀ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿੱਤਾ। ਇਸ ਤੋਂ ਬਾਅਦ ਉਹ ਲਾਸ਼ ਨੂੰ ਕਾਰ ‘ਚ ਰੱਖ ਕੇ ਘੁੰਮਦਾ ਰਿਹਾ, ਫਿਰ ਪਿੰਡ ਮਿਤ੍ਰਵ ਦੇ ਇਲਾਕੇ ਦੇ ਆਪਣੇ ਢਾਬੇ ਦੀ ਫਰਿੱਜ ‘ਚ ਲੁਕਾ ਦਿੱਤਾ। ਢਾਬੇ ‘ਤੇ ਲਾਸ਼ ਨੂੰ ਲੁਕਾਉਣ ਦੀ ਸੂਚਨਾ ਕਿਸੇ ਨੇ ਪੁਲਿਸ ਨੂੰ ਦਿੱਤੀ ਤਾਂ ਪਤਾ ਲੱਗਾ,ਸਾਹਿਲ ਨੇ 10 ਫਰਵਰੀ ਨੂੰ ਹੀ ਇਕ ਹੋਰ ਲੜਕੀ ਨਾਲ ਵਿਆਹ ਵੀ ਕਰਵਾ ਲਿਆ ਸੀ।